Jæja, dagur 22 er runninn upp og allt gengur að óskum.  í gær tók ég bara sheik dag og enga máltíð því ég var að vinna svo lengi að ég nennti ekki að fara að elda þegar ég kom heim.  Ég tók með mér eina peru í vinnuna á meðan samstarfsmenn mínir fóru í mötuneytið og gæddu sér á dýrindis lambasteik sem þeir kyngdu niður með ísköldu gosi Bara girnilegt.

En í morgun vigtaði ég mig og ég hefði getað hoppað hæð mína því vigtin sýndi ýmist 69.5-70.0.  Ég steig því aftur á vigtina og hún sýndi mér slétt 70.0.

Vá, hvað ég var glöð því nú eru sextíuogeitthvað handan við hornið og þá er stefnan tekin á það að fara ekki aftur yfir 70 kg.

Oh, ég veit að þið skiljið þetta hvað maður peppast allur upp, ég er sem sagt núna búin að missa 3.5 kg á þremur vikum sem verður bara að teljast gott miðað við að ég var kannski ekki svo þung fyrir.

Nú held ég ótrauð áfram og stefni á að vera komin í kjörþyngd fyrir sumarið en þá er stefnan tekin á eina góða sólarlandaferð og ekki yrði amalegt að vera orðin 10 kg léttari en í fyrra þegar ég var úti.

Munið svo að gera þetta með bros á vör og þakka fyrir hvern fokinn sm eða hvert fokið kíló því það ætlar ekki að koma aftur, við erum búin að kveðja það að eilífu

Jæja, nú er ég búin að vera á LR í 17 daga og vigtin í morgun sýndi 70.5 kíló og hef ég ekki verið svona létt í yfir 3 ár. Þegar ég varð ófrísk af yngra barninu mínu að þá var ég 64 kíló í byrjun meðgöngunnar og fannst ég þung - skil ekki alveg hvað ég var að spá þá

En vigtin heldur samt áfram að fara niður og ég brosi út að eyrum því nú styttist í langþráðu sextíuogeitthvað töluna mína. Ég leyfði mér samt eina bakarísbollu á sunnudaginn og aðra heimabakaða á mánudaginn en það er allt of sumt af öllu óhollu sem ég hef látið inn fyrir mínar varir.

Mig dreymdi meira að segja í nótt að ég hefði verið að drekka venjulegt kók og mér leið í draumnum eins og ég væri að gera þvílíkt mikið af mér. Mikið var ég glöð þegar ég vaknaði því ég hef ekki snert gos alla þessa 17 daga, ekki einu sinni sódavatn - bara gamla góða vatnið.

Ég mæli svo með þessum kúr því ég hef lært að borða ávexti og grænmeti upp á nýtt og í millimál borða ég epli, perur,appelsínur,melónur,vínber og alla girnilega ávexti sem ég get fundið og á hverju kvöldi er diskurinn minn stútfullur af brokkolíi, blómkáli og gulrótum. Algjört æði!!!

Gangi ykkur vel skvísur, kíki minn bloggrúnt á eftir.

Stundum er ég að pæla í því hvernig við sjáum okkur sjálfar og svo hvernig aðrir sjá okkur.  Sumir segja við mig þú lítur svo vel út eins og þú ert og mátt ekki verða of grönn, aðrir segja já þú mættir alveg missa smá sérstaklega ef þér líður vel af því.  En málið er að ég er ekki að gera þetta fyrir aðra en sjálfa mig, eða hvað?  Ef fólk væri ekki að hamra á því í þjóðfélaginu að maður verði að vera með ákveðið BMI -gildi eða vera í kjörþyngd og fólk fengi að vera óáreitt eins og það er - væru þá allir ögn glaðari og ánægðari með sjálfa sig? Hvað haldið þið?

Mitt svar er já, það er nefnilega meðal annars þjóðfélagið sem pressar á okkur að líta vel út og við erum öll sett í eins kassa. Svo miðlum við þessu niður til barnanna okkar sem alast upp við sömu gildi.  Þá er ég ekki að tala um að offita sé holl en öll þessi pressa að vera ekki of feitur getur líka haft andhverf áhrif.

Hvernig væri að vera ánægður með sjálfan sig eins og maður er og gera þetta á þeim forsendum að maður vilji vera heilbrigður númer 1,2 og 3 en ekki af því að maður vill líta út eins og allir aðrir.  Er ekki sniðugra að ala börnin sín upp þannig að maður eigi að vera maður sjálfur fram í fingurgóma en ekki einhver stöðluð týpa?

Við erum eins og við erum og eigum að þakka fyrir það. Svo lengi sem við höfum heilsuna að þá skiptir annað ekki máli. Það að vera ánægður með sjálfan sig eins og maður er - er mjög sjarmerandi og heillandi og smitandi í leiðinni.

Verum ánægðar með okkur, hvernig sem við erum og náum okkar markmiðum á okkar eigin forsendum.

Góða helgi.

Vá, ég hef sjaldan farið í "megrun" og liðið svona vel á meðan.  Ég er stútfull af orku, sef eins og steinn - er sjaldan svöng og grennist samt.  Steig á vigtina í morgun sem sýndi mér 71.0 og ég þakkaði vigtinni kærlega fyrir þessa fallegu tölu.  Fyrir stuttu var ég komin upp í 74.5 kíló og fannst ég eins og upplásin blaðra, fötin ætluðu að rifna utan af mér en núna sé ég stóran mun þó ekki séu kílóin fleiri.

Ég held mig líka alveg frá óhollustunni, borða eina holla máltíð á dag og lifi svo á ávöxtum og grænmeti og sheiknum góða.  Ég elska að blanda mér þennan ljúffenga sheik á morgnana og borða hann með skeið á meðan ég glugga í blöðin.  Manni líður líka svo vel á eftir og mikill munur frá því að ég hesthúsaði í mig ristuðu brauði og diet-kóki í morgunmat.

Svo drekk ég auðvitað bara vatnið og teið og núna styttist aldeilis að ég verði aftur sextíuogeitthvað kíló eins og ég var vön.  Ég hef alla vega ekki verið svona létt síðan ég átti yngra barnið mitt og þetta hvetur mig bara áfram í að vera komin niður í kjörþyngd mína, sem er 67 kíló í mesta lagi fyrir marsmánuð.

Vitiði til, ég skal ná því

Jæja, nú er ég búin að vera á kúrnum í viku og árangurinn hefur ekki látið á sér standa.  Þegar ég byrjaði var statusinn í þvaginu eða ph-gildið 5.2-5.5 sem er ekki nógu gott því maður á að vera frá 7.0-7.4 og þá er sýrustig líkmans rétt.  Þegar ég tékkaði á statusnum í morgun var ég komin í 7.0 sem er frábært á einni viku og því búin að fara úr basískari líkama yfir í súrari sem hjálpar til við léttinginn.  (En þetta er of flókið til að skilja þetta og hvað þá að útskýra

En alla vega, vigtin var 71.5 í morgun og ég hafði áætlað að vera aðeins á sheiknum í 2 vikur í viðbót en í dag bætti ég við einni máltíð því ég vil heldur ekki grennast of hratt, held að það sé ekki hollt. Svo held ég að það sé meiri hætta á að maður gefist upp ef maður neitar sér um allan mat, þið kannist örugglega við það

Sem sagt, ég fékk mér smá lambafille og soðið grænmeti í kvöldmat og 2 litla maísstöngla, aðeins örlitla sósu með og sleppti gratíneruðu kartöflunum sem maðurinn minn útbjó.  Engin sulta, ekkert gos og svo er ég búin að fá mér 2 epli í dag, 1 banana, jarðaber, teið og 2 sheika. 

Næstu mánuði ætla ég svo að halda þessu áfram - það er að borða eina máltíð á dag, 2-3 sheika á móti því - ávexti og grænmeti á milli mála og sleppa áfram brauði, kartöflum, hrísgrjónum, sykri, gosi, sætindum og pasta.

Ef ég held þessari áætlun að þá ætti ég að vera búin að ná markmiðinu mínu fyrir utanlandsferðina sem ég er að fara í í aprílmánuði. Þá verð ég komin niður í mína réttu stærð og get verslað frá mér allt vit

Takk fyrir kommentin skvísur, þið eruð langflottastar!!!

Nú er dagur fimm genginn í garð og allt gengur eins og í sögu, reyndar á ég erfitt með að drekka nema eina tegund af þessum sheik því ég drekk ekki kaffi og finns latte-sheikinn því alls ekki góður. En maður lætur sig hafa ýmislegt og gleðifréttirnar eru þær að í morgun þegar ég steig á vigtina rokkaði hún frá 71.5-72 sem þýðir að 1 1/2 - 2 kg eru farin. Ég finn líka þvílíkan mun á maganum á mér og svefninn er orðinn mikið betri.

Fór meira að segja í saumaklúbb í gær þar sem voru þvílíkar kræsingar en ég snerti ekki á því og drakk bara te. Er svo stolt af sjálfri mér þessa dagana. Ég verð pottþétt komin í kjörþyngd í apríl með þessu áframhaldi, er það ekki annars

Jæja, dagur eitt gekk eins og í sögu. Var reyndar að vinna til níu um kvöldið og borðaði kvöldmatinn svolítið seint en það er betra en að sleppa honum enda var ég orðin farlama af hungri

Fékk mér grillaða kjúklingabringu og soðið grænmeti og einn maísstöngul. Auðvitað drakk ég bara vatn með og er stoltust af mér fyrir að vera alveg hætt í diet-kók drykkjunni- það tók aðeins á

Steig á vigtina í morgun að gamni og var þá slétt 73 kg. Sem sagt hálft kíló farið síðan í gær en ég held að það hafi bara verið vökvatap því ég hætt að telja klósettferðirnar eftir tíu ferðir, það er nú meira hvað maður er alltaf í spreng.

En ég drakk um 2-3 lítra af vatni í gær og svo byrjaði dagurinn í dag vel líka.  Fékk mér töflurnar , teið og aloe vera gelið í morgun ásamt létt-drykkjarjógúrti.  Um hálf ellefu fékk ég mér smá vatnsmelónu og núna í hádeginu ætla ég að fá mér grillaða kjúklingabringu og soðið grænmeti, fá mér svo te í eftirrétt og taka töflurnar og gelið

Þetta leggst svo vel í mig og ég hef sjaldan verið jafn ákveðin í því að vera orðin algjör BOMBA fyrir sumarið eða var það BOBA eins og Bubbi skrifaði það.

Gaman að sjá kommentin frá ykkur, þið eruð frábærar.

Baráttukveðjur til ykkar allra, Á.

Jæja í dag byrjaði ég á LR-kúrnum og er dagurinn því búinn að vera svona:

Morgunmatur: 6 probalance töflur, 30 ml Aloe vera gel og te.  Létt drykkjarjógúrt og 1/2 banani, stórt glas af vatni.

Millimáltíð: 1/2 banani, stórt glas af vatni

Hádegi: Eggjakaka með skinku og osti, stórt glas af vatni. Aloe vera gel, 6 probalance töflur

Millimáltíð 1: 1 Epli, te

Millimáltíð 2: Banani, vatnsmelóna, te

Kvöldmáltíð: 6 probalance töflur, Aloe Vera gel, maísstöngull, ein kjúklingabringa grilluð, soðið grænmeti og grænt pestó, 2 msk.

Kvöldsnarl: Vínber, te

Svona verða næstu tveir dagar hjá mér og þá fer ég að taka inn sheik í staðinn fyrir máltíðir í allt að tvær vikur. Er að sleppa brauði, sykri, hrísgrjónum, pasta og kartöflum.  Einnig öllu gosi, drekk einungis vatn og te næstu vikurnar

Hlakka til að kíkja bloggrúnt á ykkur - hef haft allt of mikið að gera en já þyngdin í morgun var 73.5 svo það verður gaman að fylgjast með vigtinni hrapa vonandi niður á næstunni

Gangi ykkur öllum vel

Hæ, kæru bloggvinir!

Nú er ég mætt aftur eftir langa....... pásu.  Úff, ég datt bara alveg úr þessum blogggír og var ekki að nenna þessu en nú ætla ég að taka upp þráðinn og gera eitthvað í mínum málum.  En staðan mín er svona núna:  Þann 9.janúar byrja ég á LR-henning kúrnum og ég ætla að blogga um árangur minn hér.  Eins og er stefni ég á að losna við 10-13 kíló og er mjög bjartsýn á þennan kúr, hef séð ótrúlegasta fólk hrynja niður

Svo fékk ég langþráðan kílómetra og púlsmæli í jólagjöf og stefnan er tekin á að hlaupa 10-20 kílómetra á viku, hvort sem er úti við eða á brettinu.

Gaman að sjá hve margir kíkja hér við og núna verð ég dugleg að kíkja á ykkur kæru átaksbloggarar og styðja ykkur eins og ég get

Gangi ykkur vel - knús......

Er farin að finna mikinn mun á líkamanum mínum eftir allar æfingarnar upp á síðkastið.  Mikið er gaman að sjá að líkaminn er farinn að tónast aðeins og vöðvarnir eru að verða sjáanlegir - það er ekkert smávegis hvetjandi.  Ég er þó allt of oft að stíga á vigtina og svekkja mig á því að ég fari ekki hraðar niður á við.  Í morgun var ég 73 kíló og er farin að þrá það að komast niður fyrir 70 kílóin.  En maðurinn minn orðaði þetta alveg yndislega og ég reyni að hafa það í huga:  Hann sagði: ,,Líter af gulli er mikið þyngri heldur en líter af vatni".  Þetta er alveg rétt að auvitað eru vöðvarnir þyngri en fitan og þar til fitan fer að víkja fyrir vöðvunum að þá þarf ég að vera þolinmóð og hugsa frekar um það jákvæða eins og að buxurnar eru orðnar víðari o.s.frv........

Kannist þið við þetta skvísur, þið sem eruð duglegar að æfa - hvenær fóruð þið að léttast?????